真相幾錢斤（下）
上集：https://bit.ly/3l6K900
琪琪突然問：「你知唔知我最大嘅心願係乜嘢？」
我答：「一道雷劈死個禽獸？」
「嗰陣我日日俾女同學話我狐狸精，放學又被韋老師『特殊對待』。」
琪琪好認真咁望住我：「我就諗，我大個咗，一定要過平靜嘅生活，唔好俾人留意、俾人議論。」
我解釋，呢種案件都會保密受害者嘅身份，唔會俾人知。
琪琪搖搖頭：「依加咁興起底，你確定？依加咪好保密囉，我唔講，韋老師都唔會周圍講，我過得好平凡、好開心啊，你做咩一定要搞我？」
「我搞你？咁我哋就畀隻禽獸逍遙法外，再害其他細路女？」我難以置信。
琪琪答：「你都話佢冇做老師啦。」
我努力勸佢：「冇做老師，唔等於唔會接觸到細路女，如果有個細路女......」
琪琪打斷我嘅說話：「我要對佢嘅惡行負責任？求吓你放過我，我依加好好，如果你唔滿意女友有過呢種經歷，我哋分手啦。」
「呢個唔係你嘅錯，我唔係怪你......」
無論我點樣講，琪琪都堅決同我分手。
但真相唔可以就咁埋沒，罪人要承擔自己嘅過錯。
於是，我花咗好多功夫，搵到當年琪琪嘅同學名單，慢慢打聽，終於搵到啲蛛絲馬跡，可以推論出表叔當年嘅淫行。
事隔咁耐，證據有啲難搵，但僅僅係推論，就已經引起媒體嘅注意，網民將表叔起底，叫大家留意呢個戀童癖。
呢個時候，琪琪打電話畀我：「個Post係你開嘅？你一定要害我？」
「咩Post？」我一時反應唔切。
原來，網上已經有琪琪嘅舊同學爆料，推論出被侵犯嘅係琪琪，大家就順手將琪琪起埋底。
我即刻睇個Post，然後講：「唔駛擔心，大家都撐你、鬧個禽獸㗎。」
「我唔想大家撐我，我想大家唔知！」
琪琪語帶哭腔：「公司所有同事都睇晒啦，人人都嚟安慰我，表面上同情憐憫，仲有八婆喺背後笑我，我做咗公司嘅紅人啦，你滿唔滿意？」
我都唔知講咩好，手足無措之下，唯有講：「事到如今，不如你出嚟指證佢？」
琪琪冇出聲。
「只要你講出真相，佢就會被繩之以法！」我愈講愈激動。
「真相，真係咁重要咩？」琪琪講完呢句，就cut咗我線。
三日後，琪琪自殺，佢死前，上網出咗個post，話我始亂終棄，嫌佢被老師侵犯過，同佢分手，佢頂唔順所以自殺。
我呆咗，一時間，所有人都鬧我賤男。
我下意識要反駁，但唔知從何講起，琪琪用條命嚟控訴，我百口莫辯。
真相唔係咁！唔係我害死琪琪！
我想高聲吶喊，卻忽然有一絲心虛，假如琪琪冇識到我、假如我冇查表叔嘅事......
我揭露咗琪琪最不欲人知嘅真相，於是，琪琪用條命嚟講一個大話。
呢一次，我都知道真相，但永遠冇人相信我嘅真相。
真相，到底邊一個可以決定揭唔揭露？
而我哋相信嘅「真相」，又係唔係真相？
－完－
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #真相幾錢斤
Search